Leifste Ülle en Üllsjere,

’t Is veur miesj ‘n jroëse ier öm dis joar d’r Prins va Vols tse zieje èn doabeej namens de Grensülle d’r vastelovvend oes tse drare in ós sjtèdsje! Als 78e Prins va Vols bèn iesj verieërd dat iesj noa ‘t 7×11 jöariesj joebieleumsjoar d’r óptakt ken jevve veur de kommende 11 joar carnaval in ós Vols!

Jeboare i Tebannet han iesj va mieng eldere ’t vastelovvend viere als klènge boersj jelieërd. Ooch bèn iesj doa i 1996 Kèngerprins jeweë en mietjlied  van d’r Kèngercarnaval. Mienge droom woar ’t da ooch öm ‘ns jroeëse Prins tse weëde, jenouw wie mienge pap i 2000 i Tebannet. En noen passiert dat da ooch en bèn iesj zieër dankbaar dat deë droom noen is oeskomme. Weë hauw jedaat dat dit als Prins va Vols zouw zieëje?

Nò Vols bèn iesj komme veur de liebe van mie leëve. Deuresj de moeziek han iesj e risjtisj Völser mèdsje lieëre kenne: mieng vrauw, ’t Wendy va Zegers. Dis joar is dat jenau 2×11 joar jeleë en noa zoe veul joar veul iesj miesj da ooch risjtiesj heem heej i Vols en ooch Völser.

De mieëtste luuj zalle miesj zisjer kenne mit mieng trómpet, mieng anger jroeëse liebe in mie leëve. ’t Sjpeële doadróp han iesj jelierd van d’r Richard Didden. Mit mieng tröat bèn iesj ümmer wál urjens òngerweisj, als mietjlied van de ‘Moeziek’ va Vols en Tebannet, van ‘t Koperensemble in de kéresj, van ‘de Kerstengeltjes’ óp Hèllieje-ovvend, va ‘Stolz ohne Holz’, van ‘de Eiserbachmusikanten’ oes Boches en als rezerf van ‘d’r Sjlappe Kroam’. Veur tsiesj anger zaachens bèn iesj ooch tse vènge wèn ’t mè mit moeziek hat tse maache .

In ’t aafjelofe joebieleumsjoar van de Grensülle han iesj deë sjönne Völser vastelovvend noch intensiever könne mitmaache. Mienge zoon Giann woar als Kèngerhofnar tse zame mit d’r Kèngerprins Sepp en de Kèngerprinses Mila ’t “Joebieleums Dreigestirn” van d’r Kèngercarnaval. Mit hön motto ‘Viert duur mit ós mit’ hant ze jans Vols óp d’r kop jezatse en tse zame mit de eldere van die anger 2 kènger hant ’t Wendy en iesj wie èng jroeëse famielieje da ooch tsèmliesj jèt sjtöndsjere mit- en deursjjevierd. Heej hant vuur vrunde veur ’t leëve dra övverjehauwe. Wie sjön ken ’t zieë!

Als Prins mós me ooch ‘ne jouwe Hofnar haan! Mienge Hofnar is d’r Bram Ladeur van ‘t Manuela Crutzen en doa bèn iesj sjtools dròp. Tsoemaal wail nit allèng vuur tswei, mè ooch ós vrauwe en kènger bètste vrunde zunt. Iesj ken noch ömmer nit jót bejriefe wie flot en övvertsujend d’r Bram “joa” zaat wie iesj hem vroaret öm mienge Hofnar tse weëde. Dat woar nämliesj óp d’r daach dat ze d’r sjlussel va hön nuij hoes kroare! Jots-jedank zunt vuur óp tsiet veëdesj woade mit alle kluswerek en könne vuur noen tse zame de kommende vastelovvend veuróp joa!

​

Mit òs kènger zunt vuur allemoal mietjlied van de ‘Moeziek va Vols’ en sjpeële e insjtroemènt. Mit de Moeziek en oze vrundejroep trèkke vuur mit de carneval ömmer mit en hant da de jruëtste sjpas. Vuur vènge ’t da ooch mieë wie klasse dat de ‘moeziekfamielieë’ èndliesj wier ‘ne Prins en Hofnar oes hön mèdde hant, veural ooch wail 2026 hön 190^e joebieleumsjoar is! I ozere hèngerkop veult ’t da doch ooch waal e bis-je aa wie joebieleumsprins en hofnar. Zoe wie duur könt leëze zunt vuur risjtieje verainsluuj en zoeë hant vuur i Vols veul veraine die mit de vastelovvend verbonge zunt en mit viere dunt. Allèng kèn me jèt sjöns doeë, mè tse zame ken vuur oze Völser vastelovvend losse sjtrale!

Os motto is doarum veur dizze sezong: TSE ZAME SJTRALE!

En dat is wat vuur dizze vastelovvend da ooch jeer mit uusj wèlle: tse zame sjtrale heej i ós Vols.

Iesj vruij miesj dróp öm tse zame mit mienge Hofnar d’r Bram en de Grensülle uusj tse komme bezukke de kommende tsiet óp al die veransjtaltoenge, zitsoenge en recepties die je-orjaniezierd weëde deursj alle veraine, doamit vuur uusj mit vastelovvend könne bejrusse en da oze Völser carneval tse zame te losse sjtrale!

En i deë zeen: Dreejmoal donnerend krèftesj VOLS ALAAF!

Prins Roland I